19.03.2017 / Uncategorized @rm / /

La PCD ha nominau candidatas e candidats per las elecziuns communalas dad Ilanz/Glion

Ils 15 da mars, a caschun da sia radunonza generala, ha la PCD Foppa nominau las candidatas ed ils candidats per las elecziuns communalas dad Ilanz/Glion che han liug ils 21 da matg.

La radunonza ha giu liug a Castrisch, ella patria da Carmelia Maissen che vegn proponida sco candidata pil presidi e cunquei sco successura dil president partent Aurelio Casanova. La scienziada d’architectura ha 40 onns ed ei actualmein commembra dil parlament communal dad Ilanz/Glion il qual ella ha tgamunau sco emprema presidenta suenter la fusiun. Per la suprastonza ha la radunonza nominau ils suprastonts en uffeci Damian Cadalbert (Sevgein) e Roman Cantieni (Glion) e sco candidata nova Caroline Gasser (Glion) ch’era avon la fusiun commembra dil cussegl dil marcau da Glion. Per ina secunda perioda d’uffeci el parlament propona la PCD Remo Bearth (Sevgein), Ursula Brändli (Rueun), Anita Caduff (Glion), Valentin Schmid (Glion) e Kurt Vieli (Glion). E sco candidats novs Remo Camenisch, Mathilda Derungs e Claudio Quinter, tuts treis per Glion. La PCD ei perschuadida da saver presentar per las elecziuns candidatas e candidats ch’ein persunalitads hablas e versadas e che vegnan a s’engaschar en favur dalla vischnaunca.
Ultra da quei ha la radunonza reelegiu la suprastonza dalla partida circuitala che secumpona vinavon dals commembers actualmein en uffeci: Margrit Darms (presidenta), Kevin Brunold, Remo Camenisch, Carmelia Maissen ed Albert Spescha. La radunonza ha medemamein approbau il reglement da finanzas dalla PCD Surselva che reglescha da niev la finanziaziun dallas activitads da partida regiunalas.

Bildlegende:
Kurt Vieli, Remo Camenisch, Valentin Schmid, Anita Caduff, Ursula Brändli, Claudio Quinter, Carmelia Maissen, Damian Cadalbert, Mathilda Derungs, Roman Cantieni, Remo Bearth, Caroline Gasser (v.l.n.r.)

Kontakt