13.05.2019 / Communiqués / /

Cumpromiss ein buca cumadeivels, anzi, els ein curaschus

La PCD Foppa ha envidau mesjamna sera a Glion alla radunonza annuala. Vegnius ei era Stefan Engler, parsura dalla partida cantunala e cusseglier dils stans. El ha referiu davart il coc dalla PCD e sias incumbensas el parlament a Berna. Per el consista il profil dalla PCD buc ord provocaziuns ni igl hanletg cun temas. Il profil dalla PCD seigi sulettamein da semiserar vid sias rispostas sin las damondas relevantas dalla societad. El center da quellas stattan il senn da responsabladad, stabilitad ed igl equiliber. Stefan Engler ha rendiu attent che crear cumpromiss seigi forsa buca zatgei sempel e cumadeivel. Anzi – ei seigi curaschus da bandunar igl agen meini en favur digl entir e da crear aschia ina sligiaziun che vegni purtada dalla maioritad.


Ord vesta dalla PCD grischuna stattan a Berna tematicas sco la colonialisaziun decentrala, il svilup dallas periferias e muntognas, la planisaziun da territori, colligiaziun e service public, l’ulivaziun da finanzas ni l’identitad culturala e damondas da minoritads el center. Per quels interess s’engaschan era las treis candidatas ed ils dus candidats per las elecziuns dil cussegl naziunal ch’ein sepresentai alla raspada. Quei eran la meinafatschenta dalla cuminonza d’interess turissem Grischun Yvonne Brigger Vogel e la presidenta communala dad Ilanz/Glion Carmelia Maissen dalla gliesta principala sco era ils treis Sursilvans Kevin Brunold, Sarina Caduff e Fabian Collenberg dalla gliesta dalla PCD Giuvna. Plinavon ha la radunonza elegiu la suprastonza dalla partida circuitala. Sper ils suprastonts entochen uss Remo Camenisch, Glion, Carmelia Maissen, Castrisch, e Albert Spescha, Pigniu fan daniev era Remo Camenisch da Flond e Remo Cahenzli da Sagogn part dalla suprastonza. Els remplazzan Margrit Darms, Schnaus, e Kevin Brunold, Surcuolm. Niev president ei Remo Cahenzli.