04.08.2020 / Communiqués / /

Sandra Maissen ed Yvonne Brigger-Vogel en suprastonza

(cp/gc) Las dunnas dalla partida cristiandemocratica (pcd) dil Grischun vulan nezegiar il success che las dunnas han giu tier las elecziuns naziunalas 2019 e mettan perquei il focus sin motivar  dapli dunnas da s’engaschar sil camp politic.

La suprastonza ei cumpleta
La radunonza annuala  dallas dunnas dalla partida cristiandemocratica (pcd) dil Grischun ha stuiu vegnir menada atras uonn online muort la situaziun da corona. Ultra dallas tractandas statutaricas ein era las elecziuns ella suprastonza curdadas quest onn.
La presidenta Jeanette Bürgi-Büchel, da Zezras e la cassiera Nicolina Laim, da Tusaun, ein vegnidas reelegidas honorificamein. Da niev entran en suprastonza: dr. Sandra Maissen, da Cuera, che candidescha per il Cussegl dil marcau da Cuera, ed Yvonne Brigger-Vogel, da Zezras, stada 2019 candidata dalla pcd per il Cussegl nazional. Ella ei meinafatschenta dalla cuminonza d’interess da turissem el Grischun.
Demissiunau – suenter biars onns d’engaschament – han la vice-presidenta e deputada Gabriela Tomaschett-Berther, da Trun, ed Elisabeth Sigron, actuara e commembra dalla suprastonza communala da Vaz/Obervaz. Per lur engaschi politic  vegnan ella undradas a caschun dall’occurrenza d’atun en Engiadina.
Dunnas che s’engaschan politicamein
Sil camp communal candideschan igl atun 2020 ulteriuras versadas e qualificadas politicras  dalla pcd. A Panaduz eisi: deputada e l’actuala presidenta communala Elita Florin-Caluori che stat a disposiziun per ina ulteriura perioda. Per il cussegl da scola fan quei leu:  Maria Caduff Wasescha e Bettina Pinchera. A Cuera vul  dr. Sandra Maisssen gudignar in dils 3 sezs el Cussegl dil marcau. Jacqueline Giger Cahannes e Ruth von Wyl cumbattan per in mandat el Cussegl communal da Cuera (legislativa). Il trio vegn cumpletaus tras  Nadine Küng, candidata sco derschadra en pensum cumplein per la Dertgira regiunala.
A Landquart  candidescha Marion Zanetti per la suprastonza communala e Christa Baumann sco commembra dalla cumissiun da gestiun. A Domat ei Nesina Ackermann-Gartmann nominada per la suprastonza comunala e Livia Beer-Rampa per il cussegl da scola. Per il cussegl da vischnaunca semettan a disposiziun per ina ulteriura perioda: Andrea Bäder-Federspiel ed Anita Decurtins-Jermann.
Las dunnas dalla pcd surprendan responsabladad per ina attractiva e favoreivla politica a favur dalla  famiglia el Grischun e s’ engaschan cun iniziativa ed activitad.