04.11.2020 / Communiqués / /

Fracziun dalla PCD propona ina votaziun da variantas davart il sistem electoral futur

Votantas e votants duein haver ina vera schelta per la decisiun tenor tgei sistem ch’il Cussegl grond vegn elegius el futur. Perquei propona la fracziun dalla PCD che la populaziun sa decider en ina votaziun da variantas denter in model mischedau ni in model da proporz. Ina tala procedura augmentass marcantamein l’acceptanza dil sistem electoral futur e la stabilitad a media vesta.

L’jamna vargada ha la cumissiun per politica da stadi e strategia entschiet la deliberaziun dil messadi “Adattaziun dal sistem electoral dal Cussegl grond”. Ella ha incumbensau la regenza dad elaborar en detagl in sistem da proporz (model C), supplementarmein tier il model da maiorz E. La fracziun dalla PCD sustegn quella procedura en vesta dalla gronda muntada statalpolitica da quei project per la situaziun politica futura el Grischun e ves’ei sco giustificau dad examinar da rudien omisdus models.
Ual perquei propona la fracziun dalla PCD che la populaziun duei saver decider en ina votaziun da variantas davart il sistem electoral – ella duei pia buc mo saver dir gie ni na tier in sulet model. Plirs motivs plaiden per ina tala via. Dapi 1937 ha la populaziun grischuna buca meins che otg ga detg gie tier il maiorz e refusau ina midada al proporz. Ultra da quei ha la consultaziun tiel project actual mussau che la maioritad dallas vischnauncas e regiuns giavischa in model mischedau (model E). La PCD, ils Liberals e la BDP han medemamein favorisau il model mischedau, aschia che la regenza ei suandada a quellas maioritads e propona el messadi in model mischedau. Per l’acceptanza dil model futur fuss ei buca prudent dad ignorar quella prehistoria. Ed en quella damonda centrala duei la populaziun haver ina vera schelta denter in u l’auter model: in model mischedau ni in model da proporz. Ei dat negin motiv da vuler impedir ina votaziun da variantas ord interess per l’atgna partida.
Plinavon garantescha sulettamein quella via che las elecziuns 2022 han liug tenor in model che vegn purtaus dalla populaziun. Pertgei el cass che la populaziun sa mo decider davart in model e quel vegn refusaus all’urna stuess il Cussegl grond cul dretg d’urgenza ni la regenza fixar in sistem electoral provisoric. La fracziun dalla PCD ei dil meini ch’igl ei pauc serius e delicat en vesta dalla stabilitad politica da provocar in tal scenario.
En caussa meina sulet in sistem electoral sempel e clar che risguarda la varietad culturala, regiunala e linguistica dil Grischun alla finamira. Tenor la fracziun dalla PCD ademplescha il model E quellas pretensiuns il meglier e risguarda che las elecziuns dil Cussegl ein aunc adina elecziuns da tgaus, e buca da partidas.

Kontakt