01.12.2020 / Communiqués / /

Confirmaziun per la politica da finanzas cun mesira dalla PCD

Las deputadas ed ils deputai dalla PCD ein seradunai ad Aschera en Val Purtenza per preparar las fatschentas dalla sessiun dil december. Els ein semussai cuntents cul preventiv cantunal dil 2021. Las cefras ulivadas confirmeschan ch’ei sepaga da spargnar en buns temps e frenar pretensiuns excessivas davart sbassaments da taglia. Aschia resta ina certa libertad da pigliar si ina crisa sco ella semuossa actualmein.

La fracziun dalla PCD ei sescuntrada mesjamna, ils 25 da november 2020, en preschientscha dils cussegliers guvernativs Dr. Mario Cavigelli e Marcus Caduff, ad Aschera el center da formaziun Palottis culla finamira da preparar la sessiun dil december. Sco temas principals eran il program annual sco era il preventiv 2021 dil cantun Grischun tractandai. Muort la situaziun actuala cun covid-19 ei il preventiv colligiaus cun grondas malsegirtads. Ton pli pren la fracziun PCD cun plascher per enconuschientscha che las valurs directivas vegnan risguardadas e ch’il deficit budgetau da 33.7 milliuns francs semova enteifer ils deficits dils onns vargai. Lien vesa la fracziun era la confirmaziun per siu engaschi dils onns vargai da tener la mesira tier pretensiuns per novas expensas sco era per sbassaments da taglia e da risguardar las valurs directivas. Il president da fracziun, Reto Crameri, circumscriva ei sco suonda: «Spargna en buns temps, aschia has avunda en schliats». Per consequenza ei la fracziun digl avis che la pretensiun d’in program da spargn seigi precipitaus damai che in tal mass oravontut sils cuosts da regiuns periferas. «In program da sustegn sin donn e cuost dallas regiuns e vischnauncas cumbattassen nus vehementamein», aschia Reto Crameri vinavon.

Medemamein ha la fracziun pauca capientscha per la proposta dalla cummissiun da gestiun da scursanir il budget digl uffeci per l’economia ed il turissem (UET). Igl UET ha gest ella situaziun actuala ina funcziun-clav e duess esser habla da sustener l’economia sco era purtaders da projects senza restricziuns cun savida, survetschs e contribuziuns. In’ acziun da spargn fuss actualmein fatala e tuccass ils falli. Ei fuss buca responsabel da refusar mieds finanzials agl UET en in temps duront che quels ein urgentamein necessaris. Plinavon representa la fracziun era vinavon siu meini dalla sessiun digl october ch’il program da promoziun da cultura duei vegnir sustenius cun treis milliuns francs, enstagl mo cun in milliun francs sco proponiu dalla Regenza.

 

Plinavon sustegn la fracziun en principi l’incumbensa dalla cumissiun per sanadad e fatgs socials pertuccont la surpigliada da cuosts per expensas extraordinarias sco era per sperditas da rendita tier casas d’attempai e da tgira sco era tiels survetschs dalla Spitex. Quei sco mesira per dar damogn alla pandemia da covid-19. Ina maioritad ei dil meini ch’il cantun duei surprender tut las expensas unicas per saver garantir spert e nuncumplicau segirtad allas instituziuns pertuccadas. Quei pretenda deputada Carmelia Maissen en ina moziun. El medem mument duei quella munconza ella lescha en quella sparta vegnir sclarida.

Susteniment muossa la fracziun PCD era enviers la revisiun parziala dalla lescha davart la protecziun civila dil cantun Grischun sco era enviers las ordinaziuns d’urgenza da covid-19. Quellas regleschan la cumpetenza dalla Regenza da decider en temps da crisa sco era igl arranschament da votaziuns all’urna enstagl da radunonzas communalas. Approbai vegnan era il rapport e la moziun dalla cumissiun per politica da stadi e da strategia davart la realisaziun dall’iniziativa parlamentaria Vetsch (Pragg-Jenaz) pertuccont l’introducziun d’in veto per ordinaziuns: Enstagl d’in veto per ordinaziuns il qual pretenda ina revisiun parziala dalla constituziun ed irritass leutras il principi dalla separaziun dallas pussonzas, duessan ils dretgs d’informaziun dil Cussegl Grond vegni augmentai. Aschia duessan las cumissiuns predeliberontas vegnir survidas cul text dall’ordinaziun che la Regenza preveda. Igl intent lien ei che correcturas eventualas ella lescha pon vegnir fatgas ordavon. Quella procedura duei buca mo respectar la separaziun dallas pussonzas mobein era contribuir ad ina buna legislaziun cantunala.

Kontakt