21.01.2021 / Communiqués / /

PCD e PBD sclareschan il futur dall’Allianza dal Center el Grischun

Dapi igl 1 da schaner 2021 appartegnan la PBD Grischun e la PCD Grischun omisduas alla partida naziunala „Allianza dal Center Svizra“. Las duas partidas cantunalas ein secunvegnidas da sclarir communablamein co la collaboraziun politica el Grischun duei veser ora e vegnir organisada optimalmein. Ord quei motiv han ellas suttascret ina declaraziun d’intenziun ed installau ina gruppa da project paritetica. La gruppa da project ha entschiet cun sia lavur.

La PBD Svizra ha approbau a sia radunonza da delegai dils 14 da november 2020 la fusiun cun la PCD Svizra cun gronda maioritad. La PCD ha medemamein approbau claramein a sia radunonza da delegai dils 28 da november 2020 la fusiun sin livel svizzer ed ultra da quei decidiu da senumnar el futur „Allianza dal Center“. Dapi igl 1 da schaner 2021 appartegnan tras quei la PBD Grischun e la PCD Grischun sco organisaziuns autonomas all’Allianza dal Center Svizra.

El rom d’in project communabel vegn ussa sclariu las pusseivladas co la collaboraziun politica en il Grischun duei veser ora e vegnir organisada optimalmein egl avegnir, suenter che las premissas sin livel svizzer ein semidadas. Medemamein sclaridas vegnan tuttas structuras, d.a. dallas partidas cantunalas, regiunalas, cirquitalas e communalas e las fracziuns dil Cussegl Grond dallas duas partidas. La finamira ei da coordinar las structuras e resursas persunalas dallas duas organisaziuns, per che l’efficacitad politica e la preschientscha egl entir cantun san vegnir rinforzadas.

Per metter entuorn il project ei vegnida installada ina gruppa da project paritetica la quala secumpona dad otg persunas. Alla gruppa da project appartegnan da vart dalla PCD deputau Kevin Brunold (president da partida), Yvonne Brigger-Vogel (vicepresidenta), deputau Alessandro Della Vedova (vicepresident) e deputau Reto Crameri (president da fracziun). Dalla vart dalla PBD ein deputau Beno Niggli (president da partida), deputada Aita Zanetti (vicepresidenta), deputau Martin Bettinaglio (commember dalla giunta) e deputau Gian Michael (president da fracziun) commembers dalla gruppa da project. La gruppa da project vegn menada dil menader da projetct Kevin Brunold e dil vicemenader da project Martin Bettinaglio.

En in’emprema fasa fa la gruppa da project ils sclariments e las lavurs prepartoricas necessarias. Sin quei fundament vegn la discussiun aviarta enteifer las duas partidas per tut las commembras e tut ils commembers, per che quels sappien separticipar ad in vast process da consultaziun e collaborar tier la futura direcziun dalla partida. Tenor las statutas schai la cumpetenza da decider la finala tier las radunonzas da delegai dallas duas partidas.

Martin Bettinaglio (vicemenader da project) ei stimaus positivs: „Ils discuors han entschiet en bein. Las discussiuns han liug sil medem livel e suondan ina finamira communabla. Jeu sun perschuadius che nus anflein era el Grischun ina fetg buna sligiaziun per purtar vinavon il patertgar dalla PBD Grischun.“

Kevin Brunold (menader da project) ei dil meini: „La collaboraziun en la gruppa da project ei fetg constructiva. Jeu sun da buna speronza che nus savein scaffir beinspert la basa per la formaziun dil meini. Da muntada centrala vegn ad esser che nus havein avunda temps per che nossas commembras e nos commembers san menar las discussiuns necessarias. Ina gronda sfida semuossa ella formaziun e cunzun el brat dils meinis duront in temps da pandemia. Nus vegnin ad encurir sligiaziuns per che nos commembers san purtar en lur meini e discussiunar il futur politic in cun l’auter.“

Las giuntas dallas duas partidas cantunalas PBD Grischun e PCD Grischun ein perschuadidas da contribuir cun quei project considerablamein ad ina ferma politica dil center per la quala la responsablada sociala ei negina empermischun vita e la quala vegn a tener ensemen nies cantun cun libertad, solidaritad e responsabladad.

Kontakt