07.02.2021 / Communiqués / /

50 onns dretg da vuschar dallas dunnas – ei dat aunc bia da far

50 onns dretg da vuschar dallas dunnas – ei quei propi in motiv da festivar e giubilar? En ina tiara, la quala selauda da sia democrazia unica, ei la mesadad dalla populaziun resta suenter la fundaziun dil stadi confederativ 1848 per varga 100 onns exlauda dalla politica. Ed en il Grischun han stuiu vegnir sfurzadas egl onn 1983, 21 onns suenter ch’igl ei vegniu scaffiu sin livel cantunal la pusseivladad per il dretg da vuschar dallas dunnas sin livel communal, endisch vischauncas da schar cundecider las dunnas.

L’egualitad dallas dunnas ei ina via carpusa e vegn buca accumplida da sesez. Bia ei vegniu contonschiu els davos decennis, era grazia al engaschament da pionieras dalla PCD. Mo era sch’ei secapescha oz da sesez, che dunnas san votar e vuschar, dat ei aunc bia da far. Aschia eis ei in fatg, che dunnas fadigian per la medema lavur per part aunc adina pli pauc ch’umens. La posiziun dallas dunnas sin il marcau da lavur ei medemamein da migliurar, sco era las cundiziuns da basa ellas assicuranzas sozialas. Ed els gremis politics ein dunnas adina aunc sutrepresentadas. Il medem temps maunca la renconuschientscha per la lavur voluntara da valeta immensa, la quala dunnas prestan per cultura, formaziun, famiglia, baselgia ed el sozialesser.

L’egualitada da dunna ed um ei egl interess da tuts; dall’economia, dallas famiglias, da giuven e vegl. Mo cun l’integraziun da tuts essan nus sco societad robusts, solidarics, libers ed innovativs. Igl anniversari da 50 onns dil dretg da vuschar naziunal dallas dunnas ei in bien mument per se fermar, far ina survesta critica dalla situaziun e da prender a mauns cun forzas unidas ils proxims pass per l’egualitad.

La PCD Grischuna vegn a nezegiar las discussiuns per il rinforzament dil center politic en il Grischun, per dar allas damondas dall’egualitad il spazi necessari.

Kontakt