23.03.2021 / Communiqués / /

La PCD e PBD Grischun consulteschan commembers da partida davart num e fusiun

La PBD Grischun e la PCD Grischun sco organisaziuns autonomas fan dapi igl emprem da schaner 2021 omisduas part dalla partida naziunala Allianza dal Center. Ina gruppa da lavur fundada dallas giuntas dad omisduas partidas examinescha dapi entginas jamnas las pusseivladads co ina collavuraziun politica el cantun Grischun sut quellas cundiziuns semidadas – sin palancau naziunal – savess vegnir concepida ed organisada optimalmein.

Sin basa dils sclariments preliminars dalla gruppa da lavur ein secristallisadas duas damondas centralas che ston vegnir clarificadas prioritarmein:


⦁ il num da partida
⦁ la fusiun dallas partidas


Per sclarir quellas damondas da principi han las direcziuns da partida decidiu d’interrogar tut las commembras ed ils commembers leutier. Tier la PCD Grischun succeda la l’enquista en fuorma d’ina consultaziun dalla basa previda ellas statutas dalla partida. La radunonza da delegai extraordinaria dils 11 da mars 2021 ha approbau la realisaziun d’ina tala consultaziun. Ils commembers dalla PBD Grischun san exprimer lur meini enteifer in questiunari. Ils resultats dalla consultaziun dils commembers duein survir als gremis da partida sco agid d’orientaziun pils proxims pass. Las consultaziuns entscheivan quest’jamna.

Ell’annexa retschevis Vus las explicaziuns tier la consultaziun dalla basa dalla PCD Grischun sco era las explicaziuns dil questiunari dalla PBD Grischun che mintgamai tut ils commembers vegnan ad obtener sil pli tard el decuors da quest‘jamna. Ferton ch’ils documents ein adattai al process dalla partida corrispundenta ei il cuntegn identics. Cun las explicaziuns informeschan las duas giuntas ils commembers da partida en moda cumplessiva davart la situaziun da partenza, L’Allianza dal Center Grischun sco era davart la consultaziun dalla basa dalla PCD Grischun resp. il questiunari dalla PBD Grischun.

Kevin Brunold: „La gruppa da lavur PCD/PBD ha skizzau ina via communabla per la politica dil center el Grischun suenter examinaziuns fundadas. Quella via vegn sustenida dad omisduas direcziuns da partida. Cul messadi d’explicaziun elaborau survegnan ils commembers da partida la pusseivladad da furmar in agen meini sco consequenza dils resultats dallas explicaziuns sco era dallas recumandaziuns. Ussa schai ei ella responsabladad dils commembers da separticipar alla consultaziun e decider davart il num e la fusiun.“

Martin Bettinaglio: „Las direcziuns da partida dalla PBD e PCD Grischun sco era la gruppa communabla da lavur PCD/PBD ein vegni tier la conclusiun che la fusiun dallas duas partidas e la midada dil num tier L’Allianza dal Center Grischun seigien la dretga via pigl avegnir. Decisiv ei ussa sch’ils commembers da partida sustegnan quella via da principi anora. Per udir tala risposta ha era la giunta dalla PBD Grischun decidiu da menar atras in’interrogaziun tier tut nos commembers. Decider definitivamein ei en mintga cass l’incumbensa dils delegai.“

Nus engraziein a Vus ordavon per Vossa contribuziun. Astgein nus supplicar Vus curteseivlamein da setener vid il scamond da publicaziun entochen damaun mardis, ils 23 da mars 2021 allas 22.00 uras. Bien engraziament a Vus.

Kontakt