19.04.2021 / Communiqués / /

Allianza dal Center Grischun: commembers dalla PCD e PBD clar per midada da num e fusiun

Ils commembers dalla PBD e PCD Grischun ein s’exprimi en connex cul num dalla partida ed ina fusiun dalla duas partidas dil center. 78.86% dils commembers dalla PCD e 94.89% dils commembers dalla PBD ein s’exprimi per il niev num „Die Mitte Graubünden – Allianza dal Center Grischun – Alleanza del Centro Grigioni“. Ultra da quei ein 85.89% dils commembers dalla PCD e 94.89% dils commembers dalla PBD s’exprimi per ina fusiun dallas duas partidas. Quei vul dir che la basa dalla PBD e la PCD sustegn claramein l’Allianza dal Center Grischun. Ord quei motiv vegn la gruppa da project communabla ad elaborar il contract da fusiun e las statutas davart las qualas las duas radunonzas da delegai vegnan a decider ils 7 da zercladur 2021.


Situaziun da partenza
La PBD Grischun e la PCD Grischun sco organisaziuns autonomas fan dapi igl emprem da schaner 2021 omisduas part dalla partida naziunala Allianza dal Center. Ina gruppa da project fundada dallas giuntas dad omisduas partidas examinescha dapi entginas jamnas las pusseivladads co ina collavuraziun politica el cantun Grischun sut quellas cundiziuns semidadas – sin palancau naziunal – savess vegnir concepida ed organisada optimalmein.

Resultats consultaziun dalla basa e questiunari
Sin basa dils sclariments preliminars dalla gruppa da project ein secristallisadas las damondas pertuccont il num da partida e pertuccont la fusiun dallas partidas sco damondas centralas. Per sclarir quellas damondas da principi han las giuntas da partida interrogau en las jamnas vargadas tut lur commembras e lur commembers leutier. Tier la PCD Grischun ei l’enquista succedida en fuorma d’ina consultaziun dalla basa previda ellas statutas dalla partida. 809 commembras e commembers han priu part alla consultaziun. Ils commembers dalla PBD Grischun han saviu exprimer lur meini enteifer in questiunari. 176 commembras e commembers han priu part al questiunari. Ils resultats vesan ora sco suonda:

Damonda 1: Meis Vus d’accord che la PCD Grischun/PBD Grischun resp. la partida fusiunada porta egl avegnir il num «Die Mitte Graubünden – Allianza dal Center Grischun –
Alleanza del Centro Grigioni»?
Resultat: Tier la PCD Grischun ein 78.86% e tier la PBD Grischun ein 94.89% dalla commembras e dils commembers ch’ein separticipai s’exprimi per il niev num Allianza dal Center Grischun.

Damonda 2: Meis Vus d’accord che la PCD Grischun fusiunescha culla PBD Grischun?
Resultat: Tier la PCD Grischun ein 85.89% e tier la PBD Grischun 94.89% dallas commembras e dils commembers ch’ein separticipai s’exprimi en favur dalla fusiun dallas partidas.

Interpretaziun dils resultats e proxims pass
Sin fundament dils resultats dallas votaziuns sa vegnir constatau che las commembras ed ils commembers dalla PBD e PCD Grischun ein suandai en quellas duas damondas centralas cun in pli surprendent allas recumandaziuns dallas duas giuntas da partida. Quei vul dir che la via tschernida, la quala duei menar ad in’Allianza dal Center ferma ed unida, vegn sustenida dalla basa dallas partidas. Per quei motiv han las giuntas dalla PBD e PCD Grischun incumbensau la gruppa da project communabla d’elaborar il contract da fusiun e las statutas per l’Allianza dil Center Grischun. Igl ei previu che las radunonzas da delegai dad omisduas partidas decidan ils 7 da zercladur 2021 davart il contract da fusiun e las statutas. Las fracziuns dil cussegl grond duein vegnir unidas sin la sessiun digl avrel 2021 tier la fracziun dall’Allianza dil Center.

Kevin Brunold (menader da project): „La giunta dalla PCD Grischun ei fetg cuntenta che nossas commembras e nos commembers sustegnan aschi surprendentamein la via all’Allianza dil Center Grischun. Il clar votum dalla partida ei ina fetg buna basa per ina bun’entschatta dalla partida. Jeu sun perschuadius ch’igl ei central per il success futur dil cantun Grischun che nus savein realisar ina politica dil center constructiva. L’Allianza dil Center Grischun – cun las valetas libertad, solidaritad e responsabladad – vegn ad esser in garant per quei.“

Martin Bettinaglio (vicemenader da project): „Il resultat dalla retscherca confirma claramein la via che la giunta e la gruppa da project han instradau. Cun la lavur dils meins vargai ha la gruppa da project saviu mussar si che la fusiun meina ad ina situaziun da win-win per omisduas partidas. La basa dad omisduas partidas han ussa demussau ch’ellas vesan quei era aschia. Per mei ei il resultat era in clar votum ch’igl ei ussa da sclarir ils davos puncts formals per che las duas radunonzas da delegai san decider beinspert.“

Gruppa da project
La gruppa da project paritetica secumpona dad otg persunas. Alla gruppa da project appartegnan da vart dalla PCD deputau Kevin Brunold (president da partida), Yvonne Brigger-Vogel (vicepresidenta), deputau Alessandro Della Vedova (vicepresident) e deputau Reto Crameri (president da fracziun). Dalla vart dalla PBD ein deputau Beno Niggli (president da partida), deputada Aita Zanetti (vicepresidenta), deputau Martin Bettinaglio (commember dalla giunta) e deputau Gian Michael (president da fracziun) commembers dalla gruppa da project. La gruppa da project vegn menada dil menader da project Kevin Brunold e dil vicemenader da project Martin Bettinaglio.

Kontakt