26.04.2021 / Communiqués / /

Sentupada cun dunnas dalla pbd

Las dunnas dalla partida cristiandemocratica (pcd) dil Grischun han salvau lur radunonza annuala online ils 13 d’avrel 2021. Al referat suandont, da dr. med. Corina Tomaschett, Trun, eran medemamein dunnas dalla partida burgheis-democratica (pbd) dil Grischun envidadas. Cheutras ha la pcd dallas dunnas vuliu demussar ch’ella sustegni ton la midada da num dalla pcd sin „Allianza dal Center“ (Die Mitte) sco la fusiun dalla pcd cun la pbd.

Corona cun consequenzas era per la pcd da dunnas
Igl onn vargau ei staus influenzaus ferm per la pcd dallas dunnas cristiandemocratas dalla situaziun pervia da corona. La presidenta, Jeanette Bürgi-Büchel, menziunescha en siu rapport annual che bialas occurrenzas, sco p. ex. la participaziun tradiziunala al marcau da vinars da Daniev a Glion, han stuiu vegnir annulladas. Il viadi d’atun a Sogn Murezi, sils fastitgs dil turissem, ha giu liug cun paucas participontas muort corona. Quellas duas sentupadas ein impurtontas per che la pcd da dunnas sappi rinforzar sia reit egl entir Cantun. La digitalisaziun ha denton era giu effects positivs. Aschia han ins saviu observar il trend che biaras dunnas fan part pli engaschadamein da meetings online.

„L’Allianza dal Center Grischun“ sco schanza per dapli candidatas
La damonda dad ina eventuala midada da num dalla pcd e la fusiun eventuala da quella cun la pbd occupescha era las dunnas dalla pcd dil Grischun. La suprastonza sco era las deputadas dalla pcd beneventan quels pass. Ella reuniun dallas duas partidas vesan in ina schanza dapli per saver gudignar dunnas ch’ein politicamein activas.

„Dunnas separticipeschan dapli ad elecziuns“, di Jeanette Bürgi-Büchel, presidenta dalla pcd da dunnas dil Grischun. Quei effect positiv vulan ins nezegiar per las elecziuns 2022 cun trer a nez pli ferm il potenzial da dunnas. Igl eventual niev sistem electoral pussibilitescha dapli sezs sillas gliestas per dunnas. “Cumbatti per buns plazs sillas gliestas“, ei stau in appel dil schef dalla fracziun pcd el Cussegl grond: dr. Reto Crameri. La suprastonza dalla pcd da dunnas vegn a sustener activamein la partida cantunala el process da nominaziun.

Interessanta informaziun per dunnas
Suenter la radunonza eran era las dunnas dalla bdp envidadas – ed han era fatg part – al referat dalla giuvna miedia Corina Tomaschett, Trun, che ha gudignau 2019 igl emprem Premi da „Best Story discovery days“ a Flem sur dil tema: “Co dunnas inspireschan autras dunnas da viagiar – e la nova generaziun da dunnas en Bangladesch“.

Kontakt