02.05.2021 / Communiqués / /

PCD e PBD arvan consultaziun per contract da fusiun e statutas

Ils commembers dalla PCD han dau cun 85.89% ed ils commembers dalla PBD cun 94.89% lur consentiment per ina fusiun. La gruppa da lavur ha ussa elavurau ils documents relevants per la fusiun, schau approbar quels dallas giuntas da partida ed aviert la consultaziun.

Suenter il clar consentiment alla fusiun entras ils commembers dad omisduas partidas ha la gruppa da lavur elavurau las statutas sco era il contract da fusiun e tarmess quels docuemnts en consultaziun tier lur commembers respectivamein delegai. Entochen ils 6 da matg san quels prender posiziun, avon ch’ils documents purificai vegnan mess si duront 30 gis per ch’ils commembers san prender investa. Silsuenter vegnan ils delegai dalla PBD e PCD a votar ils 7 da zercladur 2021 sur dalla fusiun.
Las statutas per «Die Mitte Graubünden – Allianza dal Center Grischun – Alleanza del Centro Grigioni» sebasan sin las statutas dalla PCD Grischun las qualas ein vegnidas surluvradas cumpleinamein. En in emprem pass giuridic vegn il num midaus. Quei succeda cun l’approbaziun dalla revisiun totala dallas statutas dalla PCD Grischun entras sia radunonza da delegai. Silsuenter han las radunonzas da delegai dalla PBD e PCD d’approbar il contract da fusiun cun mintgamai treis quarts dallas vuschs dils delegai present. Sche tuttas votaziuns ein reussidas, entra la fusiun en vigur ils 7 da zercladur 2021 per immediat.
Il contract da fusiun regla las prescripziuns dalla fusiun e las disposiziuns transitorias per l’occupaziun dils uffecis e gremis. Quei ein denter auter la cumposiziun dalla giunta da partida, dalla radunonza da delegai e dalla suprastonza da fracziun dil cussegl grond. Igl ei definiu che ton il presidi dalla partida sco era dalla fracziun vegnan menai entochen il fevrer 2024 en in co-presidi. La PCD e la PBD han il dretg da tschentar mintgamai in persuna per il co-presidi. L’occupaziun equilibra vala medemamein per ils quatter vizepresidis da partida e la suprastonza da fracziun. Davart ils nums dallas persunas che vegnan ad occupar ils gremis han las partidas aunc buc menau las tractativas. Ils delegai dad omisduas partidas restan en uffeci entochen la fin dallas disposziuns transitorias.
Cun la fuorma tschernida han ils responsabels serrau ina cunvegna che lubescha ad omisduas partidas ina representanza equilibra la quala dat il rinforzament necessari per dumignar las sfidas futuras. Cun il contract da fusiun mettan las duas partidas il crap da fundament per ina ferma politica dil center.

Kontakt